Rom 14 | KMG | STEP | Mitio gegec bititicne jueŋgopieŋ jaŋe âgo miriŋ ejarenšepieŋ, ehuc wiac omanere memeŋgaru epie mu qâsuac mi ejarenšepieŋ.

Romans 14

Miti bocjaha me afecne fonâreekaczi mâmâc Wofuŋte erâ juzo

1 Mitio gegec bititicne jueŋgopieŋ jaŋe âgo miriŋ ejarenšepieŋ, ehuc wiac omanere memeŋgaru epie mu qâsuac mi ejarenšepieŋ. 2 Moc e manabâc tâmiric wiac kosa nâekac, moc e ine memeŋgaru ehuc monšaŋ sawa nâekac. 3 Irec wiac kosa nâocmuzi âgo-ticne nâ bâtâc eekac ere maname wawahane mi ezejec, â nâ bâtâc eocmuzi âgo-ticne wiac kosa nâekac ere maname mi sâqorezejec. E Anuture ŋic jaha wâc. 4 Irec go wemogezi mocte kiŋaŋ qaqa miti babaju-ticnere fuŋne mutec sâckeocmu? E sanaŋkeocmu me dockeocmu, i Wofuŋ-ticnere wiac. Erâ e mi dockeocmu, Wofuŋ e sâcne hume keteŋ ecneme qiŋ herâ domaocmu. 5 Á šoaŋ gie bapare iŋuc jaha, moc e wose bâtâc eocmu, â moc e maname qâfâsâeocmu. Moczi me moczi iŋuc me iŋuc ezo murâ mana sanaŋkehuc ezejec. 6 Ʒoaŋ gie bapa wose bâtâc eekaczi Wofuŋte erâ eekac, â nânâ kosa nâekaczi Wofuŋte erâ eekac wâc, ehuc Anutu nânâre daŋge âzâcneekac. Á nâ bâtâc eekaczi iŋuc jaha Wofuŋte erâ eekac, ehuc Anutu daŋge âzâcneekac wâc. 7 Nâŋâcnaonec moczi moc e jahacnere mi juekac â e jahacnere mi hâmoekac. 8 Juju i Wofuŋte jueŋgopeneŋ, hâhâmo i Wofuŋte hâmoeŋgopeneŋ. Irec junaŋmu me hâmonaŋmu i Wofuŋtea enaŋmu. 9 Irec hâcne Kristozi hâmokicne â ɋâricne mâmâc Wofuŋ enâreocte hâmorâ wâc ɋârewec. 10 Eme go wemogezi âgogere dâŋ mutaracmu? Me go wemogezi âgogere manatec wawahane eocmu? Nâŋâc mâmâc sasawa Anuture maio fuapene dâŋnâŋec mutara-nâreocmu. 11 Ʒiŋuc hâcne qâreŋkekicne fokac:

“Wofuŋzi mukac, no jujâmbâŋkekopacte
ŋic šeŋgoma dieŋzi henare-fârenšepieŋ
â šeŋgoma micjeŋiczi muafecnunšepieŋ.”
12 Irec nâŋâc mâmâc sasawa Anuturao fuŋne-nâŋec munaŋte munârekicne hâcne.

Nânâ qowizi uucmaŋte fârine mi eekac

13 Irec nâŋâc dâŋ mumutarac mi enšepeneŋ. Kecšiŋuc ine ezo: Ŋoŋe âgo gâcne maŋ bâsifuc ejarehuc mamana sâqoc bâfua-jarenšipiŋte manabâcko junšepieŋ. 14 No Wofuŋ Jesuhec juekopaczi šiŋuc mana sanaŋkekopac: Nânâ i me i nâhuc wâwânâŋhec eene mi fokac. Á moc e, wiac kosa nârâ wâwânâŋhec ezo, iŋuc muhuc sifu nâocmu, e ine jâmbomac wâwânâŋhec eocmu. 15 Go ine âgoge nânâre busâqoc bâfuacnetec maŋjauŋ micke-garezo. Âgoge biaŋkeocte Kristozi ere wâc hâmowec, go irec manasuhuc âgoge nânâre erâ ba imac mi ecnezemec. 16 Ŋoŋe wiac fârine bajuŋgopieŋ i ŋic gâcnezi musoriŋkenšipiŋte soŋaŋkehuc bajunšepieŋ. 17 Nânâ qowizi Anuture uucmaŋte fârine mi ekac, kiŋfâsâc fufua â wama â Tiri Mâroraonec šeri bubiaŋ izi wiac fârine. 18 Moc e hata i âtehuc Kristo kiŋaŋ qacneme e Anutuzi honeme biaŋkeocmu â ŋic jaŋe ere manapie sâckeocmu. 19 Irec hâcne nâŋâc wama foocte â miti maŋ sâc fua bâbâriŋ eocte hehesanaŋ enšepeneŋ. 20 Go nânâre erâ Anuture gie ima mi qazemec. Nânâ qowi i biaŋne sasawa, moc e ine, nârâ maŋbâiŋ gie bapemu, iŋuc manahuc sifu nâme sâqorecneocmu. 21 Go âgoge maŋbâiŋ ecnezicte ere erâ qowi â waiŋ opâ qikiŋnetec sâckeocmu. 22 Go wiac iŋucnere maŋfâsâcge fokac, i Anuture maio bajutec gahacnao sawa fozejec. Mo e wiac mocte maname sâckeha maŋbahac fâfâsâc eme biaŋkeocmu. 23 Á moc e mana maŋjahec eipiehuc sifu nâme sâqorecneocmu, e mamanasiŋ faio me ekac irec. Wiac i me i mamanasiŋ faio mi epene bahacnehec eocmu.